Undeb Amaethwyr Cymru yn croesawu apwyntiad Llŷr Gruffydd fel Gweinidog Cabinet

Mae Undeb Amaethwyr Cymru wedi croesawu penodiad Llŷr Gruffydd AS yn Weinidog Cabinet newydd Llywodraeth Cymru dros Wydnwch Gwledig a Chynaliadwyedd yn dilyn etholiad diweddar y Senedd.

Mae’r Undeb wedi llongyfarch Mr Gruffydd ar ymgymryd â’r rôl ar gyfnod hollbwysig i’r sector amaeth, gyda ffermio Cymru yn parhau i wynebu newidiadau a heriau economaidd, amaethyddol a gwleidyddol sylweddol, gyfochr â chyfleoedd pwysig ar gyfer y dyfodol.

Dywedodd Llywydd yr Undeb, Ian Rickman, ei fod yn edrych ymlaen at barhau â’i berthynas waith agos ac adeiladol gyda Mr Gruffydd, ar ôl cydweithio’n rheolaidd gydag ef dros nifer o flynyddoedd ar faterion sy’n effeithio ar deuluoedd ffermio, cynhyrchu bwyd a’r economi wledig ehangach.

Talodd yr Undeb deyrnged hefyd i’r Ysgrifennydd Cabinet dros Newid Hinsawdd a Materion Gwledig blaenorol, Huw Irranca-Davies AS, gan ddiolch iddo am ei ymgysylltiad â’r sector a chydnabod pwysigrwydd cynnal deialog gref rhwng Llywodraeth Cymru a’r diwydiant amaethyddol.

Dywedodd Llywydd Undeb Amaethwyr Cymru, Ian Rickman: “Ar ran Undeb Amaethwyr Cymru, hoffwn ymestyn ein llongyfarchiadau gwresog i Llŷr Gruffydd ar ei benodiad yn Weinidog Cabinet dros Wydnwch Gwledig a Chynaliadwyedd.

“Mae’r Undeb wedi gweithio’n agos gyda Llyr Gruffydd dros nifer o flynyddoedd, ac rydym bob amser wedi gwerthfawrogi ei ddealltwriaeth o’r heriau sy’n wynebu amaethyddiaeth Cymru a phwysigrwydd y sector i wead cymdeithasol, diwylliannol ac economaidd Cymru.

“Mae Mr Gruffydd yn ymgymryd â’r swydd ar gyfnod tyngedfennol i amaethyddiaeth Cymru a’n cymunedau gwledig, ac rydym yn edrych ymlaen at ddeall sut y bydd ffermio a chynhyrchu bwyd yn cael eu blaenoriaethu o fewn y portffolio newydd hwn, a beth fydd hynny’n ei olygu’n ymarferol i’r sector.

“Edrychwn ymlaen hefyd at barhau â’r ymgysylltiad adeiladol hwn, a gweithio’n agos i sicrhau cyflawniad ymrwymiadau maniffesto ar flaenoriaethau allweddol, gan gynnwys cymorth ffermio’r dyfodol, bTB, rheoliadau ar y fferm, a sicrhau dyfodol cynaliadwy a llewyrchus i ffermydd teuluol a chynhyrchu bwyd yng Nghymru.”

Ychwanegodd yr Undeb y bydd tymor nesaf y Senedd yn arbennig o bwysig i amaethyddiaeth Cymru, wrth i’r sector barhau i lywio newidiadau polisi, pwysau’r farchnad a disgwyliadau cynyddol ynghylch cyflawni amcanion amgylcheddol.

Pwysleisiodd yr Undeb bwysigrwydd sicrhau bod polisïau amaethyddol y dyfodol yn taro’r cydbwysedd cywir rhwng cynhyrchu bwyd, uchelgeisiau amgylcheddol a’r angen i gynnal ffermydd teuluol cynhyrchiol a phroffidiol ledled Cymru.

Defnyddiodd yr Undeb y cyfle hefyd i longyfarch holl aelodau newydd ac aelodau a ail-etholwyd i’r Senedd yn dilyn yr etholiad, gan nodi pwysigrwydd ymgysylltu trawsbleidiol cryf ar faterion gwledig ac amaethyddol yn ystod tymor newydd y Senedd.

Yn ystod yr ymgyrch etholiadol, cynhaliodd Undeb Amaethwyr Cymru raglen sylweddol o weithgareddau ymgysylltu gydag ymgeiswyr ledled Cymru. Roedd y rhain yn cynnwys ymweliadau fferm, digwyddiadau hustyngau a sesiynau briffio polisi, gan roi cyfle i ymgeiswyr glywed yn uniongyrchol gan ffermwyr a chynrychiolwyr yr Undeb am y newidiadau a’r heriau sy’n effeithio ar y sector.

Ymhlith y materion allweddol a amlygwyd gan yr Undeb yn ystod yr ymgyrch oedd dyfodol cyllid ffermio, diogelwch bwyd, mynd i’r afael â bTB, rheoliadau ansawdd dŵr a mesurau i gefnogi’r genhedlaeth nesaf o ffermwyr.

Dywedodd yr Undeb Amaethwyr Cymru eu bod wedi’i calonogi gan lefel yr ymgysylltiad a ddangoswyd gan ymgeiswyr drwy gydol yr ymgyrch ac yn croesawu’r cyfle i barhau â’r trafodaethau hynny gydag Aelodau o bob rhan o’r sbectrwm gwleidyddol yn y Senedd newydd.

Dywedodd Is-lywydd Undeb Amaethwyr Cymru, Dai Miles: “Roedd yr ymgyrch etholiadol yn gyfle pwysig i ymgysylltu ag ymgeiswyr o bob plaid ac i dynnu sylw at flaenoriaethau a phryderon ein haelodau.

“Roeddem yn falch o’r ymgysylltiad cadarnhaol a gawsom ledled Cymru ac edrychwn ymlaen at adeiladu ar y perthnasoedd hynny dros gyfnod tymor newydd y Senedd.

“Mae Undeb Amaethwyr Cymru yn parhau’n ymrwymedig i weithio’n adeiladol gyda Llywodraeth Cymru ac Aelodau o bob rhan o’r Siambr er mwyn sicrhau dyfodol cynaliadwy a llewyrchus i ffermydd teuluol Cymru a’n cymunedau gwledig.”

Ychwanegodd yr Undeb y bydd cydweithio rhwng y Llywodraeth a’r diwydiant ffermio yn hanfodol wrth fynd i’r afael â’r heriau sy’n wynebu’r sector, gan sicrhau ar yr un pryd fod ffermio Cymru yn parhau i chwarae rhan ganolog yn economi, diwylliant ac amgylchedd y genedl.