Mewn ymgais i ymgysylltu ffermwyr Cymru â chynigion terfynol y Cynllun Ffermio Cynaliadwy, mae Undeb Amaethwyr Cymru yn cynnal sioe deithiol wybodaeth i aelodau.
Lansiodd Llywodraeth Cymru'r ymgynghoriad allweddol ar ddyfodol y Cynllun Ffermio Cynaliadwy ym mis Rhagfyr 2023 - y modd bydd ffermwyr yng Nghymru’n derbyn cymorth fferm o 2025 ymlaen.
Wrth siarad am yr ymgynghoriad, dywedodd Llywydd UAC Ian Rickman: “Rydym wedi ymgynghori dro ar ôl tro gyda’n haelodau ar sawl fersiwn o’r cynllun hwn ers 2018 ac rydym bellach ar y cam mwyaf allweddol o’i ddatblygiad. Rwy’n annog ein haelodau i wneud pob ymdrech i ymuno â digwyddiad gwybodaeth yn eu sir a chymryd rhan weithredol yn y gwaith o lunio ymateb yr Undeb i’r cynigion.”
Ychwanegodd Mr Rickman, er bod yr Undeb wedi bod yn llwyddiannus yn lobïo am rai newidiadau hanfodol i'r cynllun ers ei sefydlu, gan gynnwys darparu taliad sylfaenol, mae nifer o rwystrau a chwestiynau sylweddol yn parhau ynghylch rhai manylion.
Mewn ymateb i ymgynghoriad cychwynnol Brexit a’n Tir, roedd UAC yn dadlau bod yn rhaid i unrhyw gynllun talu yn y dyfodol sy’n seiliedig ar ganlyniadau amgylcheddol a nwyddau cyhoeddus hefyd ddiogelu ffermydd teuluol, cefnogi cymunedau gwledig a swyddi Cymru a sicrhau bod amaethyddiaeth yn gynaliadwy ac yn werth chweil. Byddai methu â gwneud hynny yn debygol o arwain at niwed difrifol i ffermydd teuluol Cymru a’r rôl y maent yn ei chwarae yn economi, cymdeithas, diwylliant a thirwedd Cymru.
“Mae’r blaenoriaethau polisi hyn yn parhau i fod yn sail i’n gofynion allweddol mewn perthynas â’r Cynllun Ffermio Cynaliadwy – rhaid i’r cynllun hwn fod yn ymarferol i holl ffermwyr Cymru a chyflawni ein cynaliadwyedd economaidd, amgylcheddol a chymdeithasol,” meddai Llywydd yr Undeb.
Mae digwyddiadau gwybodaeth yn cael eu cynnal ar y dyddiadau a’r lleoliadau canlynol:
Mawrth, 23 Ionawr, 7.30yh - Ceredigion, Clwb Rygbi Aberaeron
Mercher, 24 Ionawr, 7.30yh - Dinbych & Fflint, Canolfan Genus, Rhuthun
Iau, 25 Ionawr, 7.30yh - Caerfyrddin, Clwb Rygbi Athletic Caerfyrddin
Iau 25 Ionawr, 12yp - Sir Benfro, Neuadd Goffa Treglarbes, Treglarbes
Iau, 25 Ionawr, 7.00yp - Morgannwg, Clwb Golff Grove Ltd, Porthcawl, Morgannwg Ganol
Llun 29 Ionawr, 7yh - Brycheiniog a Maesyfed, Pafiliwn UAC, Maes y Sioe Frenhinol Llanelwedd, Llanfair ym Muallt
Mawrth 30 Ionawr, 7.30yh - Ynys Môn, Canolfan CFfI, Cae Sioe Môn
Mercher 31 Ionawr, 7.30yh - Caernarfon, Pwllheli Golf Club, Pwllheli
Iau 1 Chwefror, 7yh - Gwent, Marchnad Da Byw Sir Fynwy, Ffordd y Fenni, Rhaglan
Iau, 1 Chwefror, 10.00yb - Meirionnydd, Fferm Sylfaen, Bermo, Gwynedd
Mawrth 6 Chwefror, 7.30yh - Sir Drefaldwyn, Marchnad Da Byw Y Trallwng