Mae Undeb Amaethwyr Cymru wedi nodi ei phrif ofynion o Lywodraethau’r DU a Chymru er gwaethaf yr heriau a ddaw wrth ddelio â thirwedd wleidyddol heriol sy’n newid yn gyson.

Wrth siarad yn Sioe Frenhinol Cymru'r wythnos hon, nododd Llywydd UAC, Ian Rickman, fod safiad yr Undeb yn parhau’n gyson a chadarn mewn cyfnod heriol o newid cyson yn ein hinsawdd wleidyddol.

“Mae ffermio yng Nghymru ar groesffordd bwysig gyda’r cyfle i greu sylfaen gadarn i’r diwydiant am ddegawdau i ddod. Er bod creu’r sylfaen hon yn dibynnu’n helaeth ar ddatblygu polisïau amaethyddol datganoledig yma yng Nghymru, rhaid cofio y bydd y penderfyniadau a wneir gan Lywodraeth newydd y DU yn sylfaen i’r cyllid sydd ar gael i Lywodraeth Cymru er mwyn cefnogi amaethyddiaeth a datblygu gwledig.

“Bydd y gefnogaeth yma yn ei dro yn cael effaith sylfaenol ar allu cynhyrchwyr bwyd Cymru gystadlu yn erbyn cynhyrchwyr yng ngwledydd eraill y DU, yn Ewrop ac ar draws y byd.

“Er gwaetha’r heriau, rydym fel Undeb yn canolbwyntio ar lobïo y ddwy lywodraeth er mwyn sicrhau’r canlyniadau gorau i’n haelodau, amaethyddiaeth Cymru a’n cymunedau gwledig.

“Mae ad-drefnu diweddar Cabinet y Senedd ac Etholiad Cyffredinol y DU wedi arwain at newid sylweddol i dirwedd gwleidyddol Cymru, yn enwedig penodi Huw Irranca-Davies AS yn Ysgrifennydd y Cabinet dros Faterion Gwledig. Mae ethol Llywodraeth Lafur newydd yn San Steffan hefyd yn newid arall sylweddol gyda’r posibilrwydd o symud cyfeiriad eto

“Gyda’r heriau gwleidyddol yn parhau yng Nghaerdydd gyda ymddiswyddiad Vaughan Gething mae’n rhaid i ni gynllunio am newid eto fyth yma yng Nghymru o fewn ychydig fisoedd.

Ar lefel y DU, mae UAC yn galw am setliad ariannu teg gwerth £450 miliwn yn flynyddol mewn cyllid dilynol i ddilyn y gyllideb amaeth  oedd yna arfer dod i ffermwyr a chymunedau cefn glwad Cymru o goffrau’r UE.

“Ni allwn ddiystyru pwysigrwydd y cymorth hwn fel sylfaen gadarn ar gyfer cynhyrchu bwyd, diogelu’r amgylchedd a diogelu dyfodol cymunedau gwledig Cymru.

“Mae angen i ni hefyd weld agwedd mwy cadarn o hyn allan tuag at unrhyw gytundebau masnach newydd gyda gwledydd a blociau masnachu eraill os ydym am amddiffyn ffermwyr Cymru a sicrwydd bwyd o fewn y DU.  Mae’n rhaid i fewnforion ac allforion bwyd ddilyn yr un trefniadau rholaethol a safonau os ydym am sicrhau cysondeb rhwng cynhyrchwyr bwyd y DU a’r UE.”

Mae UAC yn galw am anogaeth a chefnogaeth er mwyn i ffermwyr allu buddsoddi mewn cynhyrchu ynni adnewyddol ar y fferm fydd o fudd i gymunedau lleol.  Dylid cydnabod cynhyrchu bwyd fel ased cenedlaethol a dylid atal y defnydd o dir amaethyddol da er mwyn cyrraedd targedau plannu coed a thargedau amgylcheddol eraill.

Mae’n rhaid i bolisïau caffael flaenoriaethu cefnogaeth cyrff cyhoeddus i fusnesau Cymreig a Phrydeinig gan gydnabod yr ystod o fanteision y gall polisïau sydd wedi’u dylunio’n briodol eu sicrhau i gymdeithas. Mae’n rhaid i Lywodraeth Lafur newydd y DU ddiogelu a hyrwyddo safonau uchel y DU o ran iechyd a lles anifeiliaid a dod â chyfraith i rym sy’n sicrhau y dylid cadw pob ci ar dennyn ar dir amaethyddol.

“Er gwaethaf yr ansicrwydd yng Nghaerdydd, rydym yn galw ar Lywodraeth Cymru i feithrin cysylltiadau cryf gyda Llywodraeth Lafur newydd y DU er mwyn sicrhau bod amaethyddiaeth Cymru yn cael sylw teilwng. Rhaid diogelu cyllid amaeth fel dilyniant i’r hyn a dderbyniwyd gan yr gronfeydd yr UE yn y gorffennol sy’n allweddol ar gyfer dyfodol amaethyddiaeth a chymunedau gwledig yng Nghymru.  O ystyried hyn fe ddylid parhau i gyd-ariannu cynllun o’r fath gan sicrhau y bydd cyllid digonol ar gael gan Lywodraeth y DU.

“Mae’n rhaid i’r broses o ddatblygu Cynllun Ffermio Cynaliadwy, fydd yn rhoi sefydlogrwydd i’n ffermydd teuluol sy’n cynhyrchu bwyd, barhau os yw’r cynllun yn mynd i gael ei weithredu yn 2026.  Rhaid i’r cynllun ystyried cynaliadwyedd economaidd, cymdeithasol ac amgylcheddol yn gwbl gyfartal a bod yn hygyrch ac o fewn cyrraedd pob ffermwr gweithredol yng Nghymru.

“Rydym hefyd am weld mabwysiadu datrysiadau technolegol ac arloesol fel rhan ganolog o adolygu’r Rheoliadau Rheoli Llygredd Amaethyddol sef yr ‘NVZ’.  Mae’n rhaid i’r broses fod yn seiliedig ar ddata a thystiolaeth gadarn wrth geisio mynd i'r afael â materion ansawdd dŵr trwy arloesi yn hytrach na rheoleiddio heb ystyriaeth o le mae’r problemau’n bodoli.”

Ychwanegodd Ian Rickman bod rhaid i Lywodraeth Cymru, nawr yn fwy nag erioed o'r blaen, fabwysiadu dull gwyddonol a chyfannol o ddileu’r diciau mewn gwartheg yng Nghymru wrth weithio gyda Grŵp Cynghori Technegol. Dylid ymchwilio i effeithlonrwydd y dulliau a’r trefniadau profi presennol wrth fynd i'r afael â throsglwyddo clefydau gan fywyd gwyllt.

“Yn olaf, rhaid i gamau tuag at sero net fod yn gynaliadwy ac yn seiliedig ar wyddoniaeth gadarn yn y fath fodd fel nad yw camau gweithredu a gymerwyd mewn ymateb i dargedau tymor byr yn cael eu gwrthdroi. Rhaid i’r camau tuag at leihau ein ôl troed carbon fod yn rhwydd ac yn realistig, gan beidio peryglu cynhyrchiant neu hyfywedd economaidd ffermydd.

“Mae’r dyddiau nesaf yn ddathliad o amaethyddiaeth Cymru a’r ffermwyr sy’n parhau i gynhyrchu bwyd o safon uchel a gwarchod yr amgylchedd yn erbyn cefndir o ansicrwydd a heriau gwleidyddol.”

Dywedodd Ian Rickman mai effeithiau ansicrwydd o’r fath ar draws y DU a rhai cwestiynau polisi sylfaenol fyddai’n cael sylw seminarau UAC a gynhelir dros y dyddiau nesaf, wrth i baneli proffesiynol fynd i’r afael ag ystod amrywiol o bynciau sy’n peri pryder i’r sector amaeth yng Nghymru.

“Fel arfer, yn ogystal â’r digwyddiadau hyn, bydd ein staff a’n Tîm Llywyddol yn cyfarfod â swyddogion a rhanddeiliaid er mwyn tynnu sylw at newyddion da aelodau UAC yn ogystal a phryderon y diwydiant. Gallwch fod yn hyderus y byddwn, er gwaethaf llywio tirwedd wleidyddol heriol, yn parhau i gyflwyno ein dadleuon yn gyson a chadarn er mwyn cynrychioli buddiannau ffermwyr Cymru,” meddai Mr Rickman.

Wrth wneud sylw i ymateb Llywodraeth Cymru i’r ymgynghoriad terfynol ar y Cynllun Ffermio Cynaliadwy (SFS), dywedodd Llywydd UAC Ian Rickman: “Rhaid i Lywodraeth Cymru barhau i wrando ar ffermwyr Cymru wrth i’r crynodeb o ymatebion i ymgynghoriad diweddaraf yr SFS gael ei gyhoeddi heddiw. Mae llais y diwydiant wedi bod yn uchel ac yn glir, a hyd yn hyn, mae wedi bod yn broses heriol i bawb dan sylw.

“Nid yw’n syndod bod y farn gyffredin gan y 12,000 o ffermwyr a sefydliadau a ymatebodd i’r ymgynghoriad yn galw am newidiadau sylweddol i gynigion y cynllun.

“Dyma hefyd oedd y neges glir gan ein haelodau a ymatebodd yn unigol, a’r rhai a ffurfiodd ymateb cynhwysfawr yr Undeb i’r ymgynghoriad yn gynharach eleni. Byddwn yn gwneud popeth posibl yn ein hymdrechion i sicrhau bod y cynllun hwn yn gweithio i ffermwyr.

“Rydym yn croesawu’r sylwadau a wnaed gan Ysgrifennydd y Cabinet heddiw wrth iddo ymrwymo i gyflwyno’r cynllun dim ond pan fydd yn barod. Mae angen i hwn fod yn gynllun cymorth amaethyddol sy’n rhoi sefydlogrwydd i’n ffermydd teuluol sy’n cynhyrchu bwyd yng Nghymru ac sy’n ystyried cynaliadwyedd economaidd, cymdeithasol ac amgylcheddol ar sail gyfartal. Fel Undeb, dyma ein nod yn y pen draw o hyd.”

Mae’r datganiad ysgrifenedig gan Ysgrifennydd y Cabinet yn cyfeirio at waith parhaus Ford Gron Weinidogol yr SFS, grwpiau Dal Carbon a swyddogion wrth adolygu a gweithredu’r cynllun, mewn partneriaeth â’r undebau ffermio a rhanddeiliaid eraill.

Croesawodd UAC y cyhoeddiad na fydd yr SFS yn dechrau tan 2026 ac y bydd cyfnod o baratoi yn digwydd y flwyddyn nesaf.“Mae UAC yn gweithio’n galed ac yn ddiflino gydag Ysgrifennydd y Cabinet, rhanddeiliaid a swyddogion Llywodraeth Cymru, ac wedi cynnal trafodaethau hynod bwysig.”

Wrth gloi, dywedodd y Llywydd, Ian Rickman:“Gall aelodau UAC fod yn dawel eu meddwl ein bod yn gwneud ein gorau glas i drafod cynllun sy’n gweithio i holl ffermwyr Cymru o 2026 ymlaen. Dyma ein hymrwymiad i ffermwyr Cymru o hyd.”

Bydd Undeb Amaethwyr Cymru (UAC) yn anfon neges glir i’r Llywodraeth Lafur newydd yn San Steffan fod Cymru angen setliad ariannu teg, blynyddol o £450 miliwn mewn cyllid etifeddol y Polisi Amaeth Cyffredinol (CAP) yr UE i gefnogi cynhyrchu bwyd, yr economi wledig a’r gwaith mae ffermwyr yn ei wneud i ddiogelu'r amgylchedd.

Yn sgil buddugoliaeth ysgubol yn yr etholiad cyffredinol ar adeg pan fo ffermio yng Nghymru yn wynebu croesffordd bwysig, mae gan Blaid Lafur y Deyrnas Gyfunol gyfle nawr i ddylanwadu ar ddyfodol cefn gwlad Cymru am ddegawdau i ddod.

Wrth ymateb i’r canlyniadau, dywedodd Llywydd UAC Ian Rickman: “Yn gyntaf, hoffwn longyfarch y Prif Weinidog newydd a’i blaid ar fuddugoliaeth hanesyddol yn yr etholiad cyffredinol, ac ar yr un gwynt diolch i’r Aelodau Seneddol hynny sydd wedi gweithio’n agos ȃ ni dros y pum mlynedd diwethaf. 

“Mae’r etholiad yma wedi dod â newid sylweddol i dirwedd wleidyddol Cymru, gyda gostyngiad sylweddol yn nifer yr etholaethau, newidiadau mewn ffiniau, a nawr Llywodraeth Lafur newydd y DU yn dal y mwyafrif yn San Steffan.

“Nid yw UAC yn gysylltiedig ag unrhyw blaid wleidyddol ac felly rydym yn barod i ymgysylltu a gweithio gyda gwleidyddion o bob plaid i sicrhau bod lleisiau ffermwyr Cymru yn cael eu clywed.”

Mae Maniffesto Etholiad Cyffredinol UAC yn nodi blaenoriaethau allweddol yr Undeb ar gyfer y llywodraeth newydd, gan ganolbwyntio ar sicrhau setliad ariannu teg, aml-flwyddyn sy’n o leiaf £450 miliwn y flwyddyn mewn cyllid etifeddiaeth PAC yr UE ar gyfer amaethyddiaeth a datblygu gwledig yng Nghymru. Ni ellir diystyru pwysigrwydd y cymorth hwn fel y seilwaith i gynhyrchu bwyd, diogelu’r amgylchedd a chymunedau gwledig yng Nghymru.

Mae’n hanfodol bod Llywodraeth newydd y DU yn sicrhau bod unrhyw gytundebau â gwledydd a blociau masnachu eraill yn y dyfodol yn cymryd agwedd llawer mwy cadarn i amddiffyn ffermwyr y DU a sicrwydd bwyd. Gyda hynny, rhaid i fewnforion ac allforion bwyd ddilyn yr un arferion rheolaethau a safonau i sicrhau tegwch rhwng cynhyrchwyr y DU a’r UE.

Mae Maniffesto’r Undeb hefyd yn galw ar Lywodraeth y DU i gyflwyno polisïau caffael sy’n blaenoriaethu cefnogaeth cyrff cyhoeddus i fusnesau Cymreig a Phrydeinig gan hyrwyddo cadwyn gyflenwi fwy tryloyw.

“Er bod cyfeiriad ffermio yng Nghymru’n dibynnu’n fawr ar ddatblygiad polisïau amaethyddol datganoledig, rhaid i ni beidio ag anghofio sut y bydd penderfyniadau a wneir gan weinyddiaeth newydd y DU yn pennu faint o arian sydd ar gael i Lywodraeth Cymru i gefnogi amaethyddiaeth a datblygu gwledig. Bydd hefyd yn rheoli i ba raddau y disgwylir i gynhyrchwyr o Gymru gystadlu yn erbyn cynhyrchwyr yng ngwledydd eraill y DU ac ar draws y byd ar wahanol lefelau.

“Dyma pam na fyddwn yn gwastraffu unrhyw amser cyn cysylltu â’r Aelodau Seneddol newydd dros Gymru a’r rhai sy’n cymryd rolau dylanwadol yn y senedd i sicrhau ein bod yn amlinellu ein blaenoriaethau allweddol cyn gynted â phosib.

“Er gwaetha’r her o lywio tirwedd wleidyddol sy’n newid yn gyson, mae ein rôl fel Undeb wrth lobïo llywodraethau am y canlyniadau gorau posib i amaethyddiaeth yng Nghymru yn parhau’n waith cyson a di-baid,” meddai Ian Rickman.

Braf yw gallu cyhoeddi bod Gareth Parry wedi ei benodi yn Bennaeth Polisi Undeb Amaethwyr Cymru a hynny ychydig ddyddiau’n unig cyn ei briodas.

Roedd dathliad dwbl i Gareth, brodor o Lanfarian ger Aberystwyth, wrth iddo ef a Catrin, Rheolwr Swyddfa pencadlys Undeb Amaethwyr Cymru, briodi yn ddiweddar. Maent eisoes wedi ymgartrefu ar fferm odro, beef a defaid y teulu yn Llanafan, Ceredigion.

Mae Gareth a raddiodd gyda gradd dosbarth cyntaf mewn amaeth ac astudiaethau busnes o Brifysgol Aberystwyth yn gweithio i’r Undeb fel Swyddog Polisi ers pum mlynedd. Ef sydd wedi arwain ymateb 20,000 o eiriau diweddaraf yr Undeb i’r Llywodraeth ar y Cynllun Ffermio Cynaliadwy diweddar. Mae’n wyneb cyhoeddus i’r Undeb wrth gefnogi’r Llywydd mewn cyfarfodydd yn San Steffan ac yn y Senedd. Mae’n cyfarfod yn gyson gydag Ysgrifennydd y Cabinet dros Faterion Gwledig a’i dîm ym Mae Caerdydd, cyfarfodydd gydag aelodau ledled Cymru ac mewn cyfweliadau gyda’r wasg. 

Mae Gareth eisoes wedi dechrau yn ei rôl ac yn ymfalchïo yng ngwaith yr Undeb: “Dwi’n hynod falch o’r cyfle yma ac yn ddiolchgar i bawb am eu cefnogaeth dros y misoedd prysur diwethaf. Mae gennym dîm o staff gweithgar ac arbenigol yn Undeb Amaethwyr Cymru, ac mae’n fraint cael cydweithio ȃ nhw wrth gynrychioli buddiannau ein haelodau. 

“Dwi’n edrych ymlaen at y sioeau amaethyddol dros yr haf, y cyfle i sgwrsio ȃ ffermwyr Cymru, i drafod materion y dydd gyda sefydliadau eraill ac i baratoi at y cyfnod cyffrous nesaf i’r diwydiant. Nid ar chwarae bach y mae gosod polisi amaethyddol newydd i Gymru sy’n gonglfaen i gefn gwlad, i’r economi, i ddiwylliant a threftadaeth. Dwi’n edrych ymlaen at chwarae rhan mewn cyfnod hanesyddol bwysig i gymunedau gwledig Cymru.”

Pan fo gwaith yr Undeb yn caniatau mae Gareth yn ralïwr ceir brwd ac wedi rasio droeon fel partner y gyrrwr sy’n llywio’r ffordd. Gyda’i bartner gyrru, Scott Faulkner, daeth gartref gyda chwpan y ‘British Trials and Rally Drivers Association’ nôl yn 2019. Mae wedi teithio’r byd yn ralïo ac mae’n mwynhau ail adnewyddu ceir a cherbydau. 

Wrth groesawu’r penodiad dywedodd Ian Rickman, Llywydd UAC: “Rydym yn falch iawn bod Gareth wedi ei benodi yn Bennaeth Polisi’r Undeb. Mae’n ŵr galluog, proffesiynol a brwdfrydig dros bopeth ym myd amaeth. Rydym yn ffodus iawn o fod wedi elwa ar ei arbengiedd a’i feddwl craff dros y misoedd diwethaf. Edrychwn ymlaen at barhau i gydweithio ȃ Gareth, wrth i ni gamu i rhan nesaf y daith bwysig hon i fyd amaeth.

Dywedodd Guto Bebb, prif weithredwr UAC: “Llongyfarchiadau mawr i Gareth ar ddod i’r brig yn y rôl newydd ac i Catrin ag yntau ar eu priodas ddiweddar. Rydym yn ymfalchïo yn safon ein staff ac yn ddiolchgar iddynt ledled Cymru am eu hymroddiad i’r Undeb.

“Wrth longyfarch Gareth, hoffwn dalu teyrnged i Nick Fenwick, y cyn Bennaeth Polisi am ei waith dros Undeb Amaethwyr Cymru a ffermwyr Cymru. Rydym yn gwerthfawrogi cyfraniad Nick dros gyfnod maith i’r Undeb a’r diwydiant yn ystod ei gyfnod yn y swydd. Mae staff ac aelodau wedi cael y fraint o gydweithio ag arbenigwr amaethyddol a ddangosodd  ymrwymiad mawr i weithio ar ran ffermwyr Cymru. Dymunwn yn dda iddo ef a’i deulu i’r dyfodol.”

Heddiw croesawodd Undeb Amaethwyr Cymru y newyddion bod Ysgrifennydd y Cabinet dros Newid Hinsawdd a Materion Gwledig, Huw Irranca-Davies yn derbyn yr holl argymhellion a gyflwynwyd iddo gan y Grŵp Cynghori Technegol (TAG) sydd newydd ei sefydlu ar gyfres o fesurau a fydd yn darparu hyblygrwydd wrth ladd gwartheg sydd â’r diciau ar y fferm.

Mae teuluoedd amaethyddol sydd eisoes dan bwysau emosiynol ac ariannol oherwydd achosion o’r diciau mewn gwartheg yn aml yn eu dagaru o ganlyniad i’r profiad dirdynnol o wylio gwartheg yn cael eu lladd ar fuarth y fferm.

Dywedodd Dai Miles, Dirprwy Lywydd UAC: “Mae hyn yn newyddion rydyn ni’n ei groesawu ac rydym yn falch bod Ysgrifennydd y Cabinet wedi gwrando ar bryderon y diwydiant ac yn bwysicaf fyth cymryd camau gweithredu a derbyn yr argymhellion hyn yn llawn.”

Cynhaliodd TAG ei gyfarfod cyntaf ar y 15 o Ebrill dan arweiniad yr Athro Glyn Hewinson, sydd hefyd yn gadeirydd Sêr Cymru yn y Ganolfan Ragoriaeth TB yn Aberystwyth. 

Mae mwyafrif yr achosion o ladd ar fferm o ganlyniad i brofion positif o’r diciau mewn gwartheg tra'u bod o dan gyfnodau meddyginiaeth. Mae lladd gwartheg ar fuarth y fferm hefyd yn digwydd pan fo buchod yn drwm gan feichiogrwydd neu o fewn yr wythnos gyntaf wedi lloi. Ni chaniateir eu cario oddi ar y fferm o dan reoliadau cludo anifeiliaid.

Yn ôl Dai Miles: “Cafodd yr FUW eu gwahodd i ddarparu tystiolaeth ar lafar ac yn ysgrifenedig i TAG ei ystyried, ac rydym yn falch bod ein gwaith wedi cefnogi’r newidiadau a gyhoeddwyd heddiw.

“Nod ein hargymhellion oedd lleihau nifer y gwartheg sy’n cael eu lladd ar ffermydd yn dilyn achosion o TB mewn gwartheg a darparu cymorth mewn amgylchiadau lle nad oes modd osgoi lladd ar glos y fferm.

“Rydym yn croesawu’r ffaith bod y broses hon wedi digwydd mor gyflym ac yn gobeithio y gellir rhoi’r camau hyn ar waith cyn gynted â phosibl i leihau’r achosion o ladd ar ffermydd. Mae effeithiau’r broses hon yn cael canlyniad andwyol hirdymor ar iechyd a lles ein teuluoedd amaethyddol.

“Fodd bynnag, rhaid i ni beidio ag anghofio bod yr angen i drafod y pwnc o leddfu erchyllterau lladd ffermydd yn ceisio unioni’r symptom yn hytrach na mynd i’r afael â gwraidd y broblem. Mae hyn yn parhau i fod yn record difrifol o raglen cwbl aneffeithiol dros gyfnod maith i ddileu y diciau o fuchesi gwartheg yng Nghymru.

“Byddwn yn parhau i weithio mewn partneriaeth â TAG a rhanddeiliaid eraill i fynd i’r afael â ffyrdd eraill y gellir gwella’r rhaglen dileu TB mewn gwartheg er budd holl ffermwyr gwartheg Cymru.” meddai’r Dirprwy Lywydd, Dai Miles.

Mae Llywydd Undeb Amaethwyr Cymru, Ian Rickman, wedi croesawu’r newyddion heddiw bod Llywodraeth Cymru am barhau’r Cynllun Taliad Sylfaenol (BPS) i gefnogi ffermwyr Cymru ochr yn ochr â chyfnod paratoi’r Cynllun Ffermio Cynaliadwy (SFS) ar gyfer 2025.

Wrth ymateb i’r datganiad a wnaed gan Ysgrifennydd y Cabinet dros Newid Hinsawdd a Materion Gwledig, Huw Irranca-Davies, dywedodd Llywydd UAC, Ian Rickman: “Rydym yn croesawu’r datganiad a wnaed gan Ysgrifennydd y Cabinet ar ddyfodol ffermio yng Nghymru a’i gynlluniau i weithio mewn partneriaeth â’r diwydiant amaethyddol.

“Ers yr ymgynghoriad diwethaf, rydym wedi galw’n gyson ar Lywodraeth Cymru i ymestyn y BPS ar y lefelau presennol ar gyfer y flwyddyn nesaf o ystyried faint o newid sydd ei angen i’r Cynllun Ffermio Cynaliadwy o fewn yr amserlen dynn.

“Mae’r cyhoeddiad hwn ar gynnal y BPS ochr yn ochr â chyfnod paratoadol SFS y flwyddyn nesaf yn gam mawr i’r cyfeiriad cywir. Bydd yn rhoi sefydlogrwydd i fusnesau amaeth ac yn sylfaen gadarn ar gyfer trafodaethau ystyrlon.

“Datblygu’r Cynllun Ffermio Cynaliadwy yw’r newid mwyaf arwyddocaol mewn polisi amaethyddol yng Nghymru ers degawdau. Mae’n galonogol felly bod Ysgrifennydd y Cabinet yn nodi na fydd y Cynllun yn cael ei gyflwyno nes ei fod yn barod.”

Mae’r datganiad hefyd yn cyfeirio at barhad cynlluniau buddsoddi gwledig, gan gynnwys ystyried ymestyn Cynllun Cynefin Cymru a chymorth i amaethwyr organig.

“Mae’n hanfodol ein bod yn osgoi unrhyw fylchau yn y cymorth yn ystod y cyfnod pontio o’r BPS i’r SFS sy’n sail i gynaliadwyedd economaidd busnesau ffermio. Croesawn felly barhad y gefnogaeth wrth i ni weithio i ddylunio Cynllun sy’n cyflawni ar gyfer busnesau amaeth, ein cymunedau gwledig a’r amgylchedd.

“Er ein bod yn croesawu’r datganiad heddiw sy’n dangos parodrwydd i wrando, i weithio gyda’r diwydiant a chefnogi cefn gwlad Cymru, rydym yn awyddus i weld y manylion llawn yn natganiad llafar Ysgrifennydd y Cabinet yn y Senedd y prynhawn yma. 

“Bu drwgdeimlad mawr o fewn y diwydiant dros y misoedd diwethaf, a bydd craffu ar y manylion yn hollbwysig wrth i’r gwaith hwn fynd rhagddo yn yr wythnosau nesaf.”

“Aelodau Uneb Amaethwyr Cymru yw calon ein sefydliad a byddwn yn parhau i wneud ein gorau i sicrhau ein bod yn cyflawni’r canlyniadau gorau posib i’n ffermydd teuluol yng Nghymru,” meddai Ian Rickman.